Ish-ambasadori i Serbisë në Bjellorusi, Srecko Dukiq, tha se presidenti rus, Vladimir Putin, duke përmendur një vendim të Gjykatës Ndërkombëtare të Drejtësisë për Kosovën, për të justifikuar njohjen e pavarësisë së rajoneve separatiste ukrainase, Donetsk dhe Luhansk, do të thotë se ai në fakt e njeh Kosovën si një shtet të pavarur.
“Putin në fakt tha se ai njeh pavarësinë e Kosovës dhe gjithçka që bëri Kosova me sponsorët e saj”, tha Gjukiq për agjencinë e lajmeve Beta.
“Moska ka ndërmarrë atë që ndoshta është hapi vendimtar në njohjen e Kosovës dhe sigurisht duke ia bërë më të lehtë Uashingtonit dhe Perëndimit zgjidhjen e saj”, tha Gjukiq, i cili është gjithashtu anëtar i Forumit të OJQ-ve të Beogradit për Marrëdhëniet Ndërkombëtare.
“Serbia ka zgjedhur sërish një rrugë të pavëmendshme ndaj interesave të fuqive të mëdha, duke u ulur verbërisht në dy ose tre karrige”, shtoi diplomati në pension.
Putin, në takimin e së martës me Sekretarin e Përgjithshëm të OKB-së, António Guterres, tha se Republikat e vetëshpallura të Donetsk dhe Luhansk kanë të njëjtën të drejtë për të shpallur pavarësinë si Kosova, bazuar në precedentin e vendosur nga vendimi i gjykatës ndërkombëtare, raporton Euractiv, transmeton Klankosova.tv.
