Kryeministri bullgar Kiril Petkov ka nisur një fushatë për mbledhjen e parave, të cilat do t’i dhurohen Ukrainës për blerjen e pajisjeve ushtarake. Nëpërmjet një postimi në Facebook Petkov u bën thirrje bullgarëve të dhurojnë një rrogë për Ukrainën, ashtu siç ai ka bërë.
Krahas shkrimit kryeministri bullgar ka bashkangjitur faturën që tregon transaksionin bankar ku ai ka transferuar rrogën e tij në llogarinë që ka hapur për të ndihmuar Ukrainën.
Thirrja e kryeministrit bullgar për mbledhje parash për Ukrainën vjen pasi partitë e vendit kundërshtojnë të aprovojnë dërgimin e drejtpërdrejtë të ndihmave ushtarake në Ukrainë, pasi i frikësohen Rusisë.
Për këtë arsye Petkov thotë në Facebook se deri në arritjen e një konsesusi politik, vendi i tij do të mbështesë Ukrainën me ndihmë financiare.
Njëkohësisht Petkov njoftoi se pritet të vizitojë Kievin në ditët në vijim.
Ai do të shkojë në Kiev së bashku me përfaqësuesit e partnerëve të koalicionit qeverisës, për të parë nga afër se çfarë lloj ndihme i duhet vendit.
“Dërgimi i ndihmës ushtarake në Ukrainë kërkon unitet politik, por edhe publik. Në hapësirën publike ka shumë mendime ekstreme për këtë temë. Mendoj se është koha për ta kthyer këtë energji të komunitetit në veprim real! Si kryeministër do të vazhdoj të punoj që Bullgaria të ketë një qëndrim të unifikuar bazuar në zgjedhje të informuara, pasi javën e ardhshme po mësohem me një këshill koalicioni dhe do të organizoj një udhëtim në Kiev.
Ndihma ushtarake nuk është e detyrueshme në asnjërën nga anët – nuk janë vetëm predha apo helmeta. Le të kuptojmë nevojat reale të Ukrainës dhe të informohemi si koalicion për t’u bashkuar rreth nevojave specifike që janë të rëndësishme për ta, për të cilat ne të gjithë mund të qëndrojmë prapa.
Gjermania, Franca, Italia, Polonia, Holanda, Austria, Greqia, Suedia, Belgjika, Finlanda, Danimarka, Rumania, Norvegjia, Kroacia, Republika Çeke, Irlanda, Lituania, Luksemburgu, Estonia, Sllovenia, Sllovakia, Qiproja dhe Letonia dërgojnë ndihmë ushtarake në Ukraina dhe kjo nuk çon në një shpallje lufte kundër tyre.
Derisa të arrijmë këtë konsensus politik, si qytetarë të Bullgarisë që besojnë se askush në Evropë nuk ka të drejtë të sulmojë fqinjët e tyre dhe të vrasë civilët, ne mund të zgjedhim lirisht të ndihmojmë Ukrainën financiarish . Kjo është arsyeja pse unë po hap një fushatë publike për të mbledhur një burim financiar që do t’i jepet qeverisë ukrainase. I bëj thirrje çdo qytetari bullgar që dëshiron vërtet të ndihmojë Ukrainën të dhurojë një rrogë si unë.
Fjalët janë të lehta, veprimet janë të vështira, është koha që postimet në Facebook të bëhen fonde për Ukrainën. Shteti jemi të gjithë ne dhe të gjithë duhet të ndjejnë se mund të jenë pjesë e vendimit”, shkruan Petkov në Facebook.
Ministri i Jashtëm ukrainas Dmitry Kuleba falënderoi publikisht kryeministrin bullgar për nisjen e një fushate publike që synon mbledhjen e fondeve për Ukrainën dhe forcimin e mbrojtjes së vendit.
“Kjo lëvizje demonstron solidaritetin e vërtetë bullgar me Ukrainën ,” tha ai në një postim në mediet sociale.info,shqip.
