Kryeprokurori i shtetit, Aleksandër Lumezi, ka numëruar sukseset e këtij Institucioni në konferencën vjetore të prokurorëve.
Ai tha se gjatë vitit të kaluar është bërë një shumë e madhe, duke përmendur aksionet e mëdha që janë bërë, nga të cilat janë arrestuar shumë zyrtarë.
“Gjatë vitit të kaluar kemi pasur shumë sfida, por kemi treguar se jemi të gatshëm dhe në gjendje të reagojmë në mënyrë adekuate në të gjitha situatat. Nuk ka dilema se në periudhën e kaluar është bërë një punë mjaft e madhe që vërtetohet nga rezultatet konkrete. Gjatë vitit të kaluar kemi treguar efikasitet me mbi 50 mijë lëndë penale të natyrave të ndryshme. 793 raste të ndryshme të korrupsionit, të keqpërdorimit të detyrës zyrtare. Janë arrestuar ish ministra të Qeverisë, sekretar ë të ministrave, zyrtarë policorë, kryetarë të komunave dhe shumë zyrtarë të tjerë të lartë shtetërorë”.
“Para disa viteve as nuk është imagjinuar, e lërë më të ndodhë ndjekja penale ndaj zyrtarëve të lartë shtetërorë, kjo është bërë realitet i përditshëm. Gjatë vitit të kaluar, janë ndërmarr masa me zbardhjen e veprave më të rënda penale, janë privuar nga liria shumë pjesëtarë të ndryshme të grupeve kriminale. Aksioni Subvencioni, aksioni për konfiskimin e 400 kilogramëve kokainë, rasti Call Center, rasti Brezovica dhe të tjera. Kemi vërtetuar se puna e përbashkët ekipore ka dërguar porosi të qarta të të gjithë pjesëtarëve të grupeve kriminale se s’mund të vihen mbi Institucionet e Shtetit”.
Lumezi mes tjerash tha se gjatë vitit të kaluar, falë aktakuzave janë zgjidhur më shumë se 94 përqind të rasteve të dërguara nga gjykata.
“Sot me hapa të vegjël jemi shtet me drejtësi më të besueshme se dje dhe kjo duhet të na inkurajoj. Shpesh herë kemi dëgjuar kritika për aktakuza të dobëta, por më duhet të theksoj se pohimet e tilla kryesisht dëgjohen në mungesë të argumenteve të tjera. Gjatë vitit të kaluar falë aktakuzave janë zgjidhur më shumë se 94 përqind të rasteve të dërguara në Gjykata. Kemi rritur bashkëpunimin rajonal dhe ndërkombëtar si në rastet e terrorizmit ashtu edhe për krime të tjera transnacionale. Jemi dëshmitarë se kemi arrit rezultat të dukshëm. Do të ishte gabim të thuhej se kemi realizuar të gjitha që kemi planifikuar, do të ishte e padrejtë të mos përmendet se sistemi prokurorial është disa hapa përpara se ai që ka qenë para disa viteve. Jemi Institucion me imazh të ndryshuar”, tha Lumezi , transmeton Klankosova.tv.Ai poashtu theksoi se sfidë mbetët konfiskimi i pasurisë së fituar në mënyrë të kundërligjshme duke bërë thirrje që rastet e konfiskimit të trajtohen me prioritet.
